GRŴP TRAWSBLEIDIOL AR SIOPAU BACH

Cofnodion y cyfarfod a gynhaliwyd am 11.30am ar 2 Ebrill 2014 yn Nhŷ Hywel

YN BRESENNOL:

Janet Finch-Saunders AC (JFS)	Cadeirydd
Keith Davies AC (KD)	Aelod
Russell George AC (RG)
Rhodri Glyn Thomas AC (RGT)
Edward Woodall (EW)	ACS
Rosemary Thomas (RT)	Llywodraeth Cymru
Jon Fudge (JF)	Llywodraeth Cymru
Mair Roberts (MRR)	Ysgrifennydd
Rhodri Evans (RE)	Ffederasiwn Busnesau Bach Cymru
Ian Hunt	Archfarchnadoedd Filco
Mark Roberts (MR)	The Co-operative Group
Emma Sands (ES)	Swyddfa Grŵp y Ceidwadwyr
Craig Lawson (CL)	Suzy Davies AC
Sophie Traherne (ST)	Swyddfa Grŵp y Ceidwadwyr

2.CYFLWYNIAD

Croesawodd y cadeirydd bawb i drydydd cyfarfod y Grŵp Trawsbleidiol, a chyflwynodd Rosemary Thomas a Jon Fudge, a fyddai’n rhoi cyflwyniad ar y Bil Cynllunio sydd i ddod, ac ar agweddau ar fânwerthu a chanol trefi o Bolisi Cynllunio Cymru.

2.CYFLWYNIADAU GAN GYNRYCHIOLWYR O IS-ADRAN CYNLLUNIO LLYWODRAETH CYMRU

Rhoddodd RT a JF o Is-adran Cynllunio Llywodraeth Cymru gyflwyniadau ar y Bil Cynllunio sydd ar y gweill, ac ar agweddau ar Bolisi Cynllunio Cymru sy’n berthnasol i’r Grŵp Trawsbleidiol.

Dechreuodd RT y cyflwyniad, drwy amlinellu blaenoriaethau Llywodraeth Cymru o ran cynllunio drwy’r Bil Cynllunio, ac amlygodd fwriad y Llywodraeth i sicrhau bod fframwaith cyson yng Nghymru. Dywedodd y byddai’r Bil yn cael ei gyflwyno yn ddiweddarach eleni, gyda’r nod ei fod yn derbyn Cydsyniad Brenhinol yn 2015, a bod newidiadau mewn strwythurau cyflawni mewn grym o 2016 ymlaen.

Soniodd JF am Bolisi Cynllunio Cymru, gan gyfeirio’n benodol at yr ystyriaeth o siopau manwerthu a busnesau sydd wedi’u lleoli yng nghanol trefi. Tynnodd sylw at y ffaith bod Polisi Cynllunio Cymru wedi’i ddiweddaru’n rheolaidd, yn unol ag anghenion, ers ei gyflwyno yn 2002. Soniodd am Gynlluniau Datblygu Lleol, a dywedodd fod gan dros 60% o awdurdodau lleol Cymru eu cynllun eu hunain erbyn hyn.

Rhoddodd JF wybod i’r grŵp hefyd am y gwaith ymchwil sy’n cael ei gynnal ar hyn o bryd â Phrifysgol Southampton, ar adolygu’r Polisi Cynllunio, sydd i gael ei gyhoeddi cyn y Pasg, 2014. Bydd y gwaith ymchwil hwn yn cynnwys polisïau ar y ffordd orau o ddiogelu canol trefi.

Nododd pa mor bwysig yw bod mânwerthwyr yn ymgysylltu ag awdurdodau lleol a rhanddeiliaid eraill, i ddatblygu partneriaethau effeithiol ac atebion lleol. 

Trafodaeth

Yn dilyn y cyflwyniad, trafodwyd nifer o faterion a oedd yn deillio ohono:

Y fantais sydd i fânwerthwyr mawr o ymgysylltu â’r Broses Gynllunio

Cododd JFS bryderon bod gan fânwerthwyr mawr ac archfarchnadoedd fwy o adnoddau i ymgysylltu ag awdurdodau cynllunio lleol. Roedd aelodau eraill o’r Grŵp hefyd yn pryderu, y gallai mânwerthwyr mawr ddefnyddio arbenigedd ymgynghorwyr i’w helpu gyda cheisiadau cynllunio; yn aml nid yw hwn yn opsiwn sy’n bosibl i fânwerthwyr llai. Awgrymwyd hefyd nad oes gan awdurdodau lleol yr arbenigedd bob amser i frwydro yn erbyn datblygiadau a gaiff eu cyflwyno gan siopau mwy ar gyrion trefi.

Goblygiadau gostwng nifer yr awdurdodau lleol

Gofynnodd JFS a fyddai’r Bil Cynllunio yn effeithiol os penderfynir gostwng nifer yr awdurdodau lleol yng Nghymru yn y dyfodol agos. Nododd RT a JF y bydd y Bil Cynllunio wedi’i ddiogelu at y dyfodol, ac y bydd yn effeithiol ni waeth faint o gynghorau a fydd yng Nghymru yn y dyfodol.

Defnyddio Polisïau Canol Trefi

Mynegodd EW bryderon na fu’r polisi Canol Trefi’n Gyntaf o fewn y Polisi Cynllunio yn Lloegr yn effeithiol hyd yma i atal datblygiadau y tu allan i drefi. Nododd JF ymrwymiad Llywodraeth Cymru i ganol trefi, drwy’r ymgyrch Lleoedd Llewyrchus Llawn Addewid.

Hefyd tynnodd IH sylw at yr anhawster sydd gan fusnesau lleol i adfywio eu stryd fawr, oherwydd y diffyg arian sydd ar gael ar gyfer mentrau adfywio ar hyn o bryd.

Y camau nesaf

CYTUNWYD y byddai cyflwyniad RT a JF yn cael ei ddosbarthu i aelodau’r Grŵp.

CYTUNWYD hefyd y bydd y Grŵp yn ysgrifennu at y Pwyllgor Amgylchedd a Chynaliadwyedd ynghylch materion cynllunio sy’n berthnasol i siopau bach, fel rhan o’i waith o graffu ar y Bil Cynllunio.

Clöwyd y cyfarfod gan JFS.